Fimmtudagur ......

Í dag (tæknilega séð í gær þar sem það er komið vel fram yfir miðnætti) eru 3 vikur síðan að ég sagði fitupúkanum og sleninu stríð á hendur, já og ég hætti að styrkja WorldClass   Þessar þrjár vikur hef ég mætt samviskusamlega á hverjum degi í ræktina og púlað í rúman klukkutíma.  En til að vera alveg nákvæm þá er þetta með tveimur undantekningum en það eru 2 sunnudagar sem að ég kaus að fara frekar í langan göngutúr úti í stað þess að fara í Laugar.  Ég fer nefnilega alltaf í WorldClass í Spönginni og í sumar er lokað þar á sunnudögum.  S.s. hreyfing á hverjum degi   Þetta hefur svo sannarlega borið árangur allt þetta sprikl því að í morgun (gærdag þegar ég vaknaði) sýndi vigtin í fyrsta sinn í marga mánuði tölu sem að byrjaði á 8   Á vigtinni stóð 88,1 en það þýðir að ég er búin að léttast um 7 kíló á þessum 3 vikum   Þessi tala þýðir líka að nú er BMI stuðullinn (líkamsþyngdarstuðullinn)  hjá mér kominn þrepi neðar eða í "yfir kjörþyngd" en hann er búinn að vera í "of þung" í marga mánuði.  Til að reikna þennan stuðul nota ég reikniforrit sem ég fann á vefnum hjá Lyf og heilsu.  

Ég veit vel að maður léttist mest fyrst og svo hægist aðeins á þessu en ég er engu að síður svakalega ánægð með árangurinn   Nú er bara að halda áfram og detta ekki  í þá gryfju að fara að vera "góð" við sjálfa mig og skrópa í ræktinni og byrja að sukka aftur ........ (og þá meina ég vitanlega að sukka í mat og þess háttar )

Undanfarna daga hef ég verið að vinna frekar mikið en það útskýrir bloggletina hjá mér.  Ég er líka búin að vera 2 auka unglinga hjá mér, þær frænkur mínar Svanhildi og Signýju Björgu, þannig að það er búið að vera fullt að gera og tóm gleði

Skýjum ofar - Félagsliðanámið framundan

Fyrir nokkru síðan fór ég að spá í að taka smá hliðarspor í því sem ég er að læra, þ.e. sjúkraliðann.  Ég ákvað að fara í Félagsliðabrú hjá Mími símenntun. En fyrir þá sem veltast í vafa um hvað Félagsliðabrú er þá er það nám ætlað fólki sem vinnur við umönnun t.d. á öldrunarheimilum, í heimaþjónustu eða við heimahlynningu.  Þetta er fjögurra anna eininganám sem kennt er samkvæmt námsskrá menntamálaráðuneytisins.  Námið er 32 einingar og eru kenndar 8 einingar á hverri önn. 
En til að fá að hefja nám í Félagsliðabrú þarf að uppfylla 3 skilyrði,  vera orðin 22 ára, hafa lokið 230 klst í starfstengdum námskeiðum og hafa 3 ára starfsreynslu í umönnun.  En það síðasta, starfsreynsluna, er ég ekki búin að uppfylla   1. nóv. n.k. er ég búin að vinna í 2 ár á Hrafnistu og það er bara ekki nóg.  Ég hef hins vegar verið að vinna í því undanfarið að fá þau ár sem að ég var heimavinnandi vegna fötlunar sona minna metin sem vinnu.  Í dag kom svo svar frá menntamálaráðuneytinu um að ég fengi þennan tíma metinn og ég fæ að hefja Félagsliðanámið strax í haust

Hætt að styrkja World Class !

Ég man ekki hvort að ég hef minnst á það hérna áður en ég hef í alltof langan tíma verið dyggur stuðningsaðili WorldClass.  Ég borga í hverjum mánuði ríflega 4.000 krónur á mánuði fyrir aðgang þar.  En það hefur farið eitthvað lítið fyrir því að ég noti mér þennan aðgang   Svona getur maður nú verið mikill auli   EN frá því um s.l. mánaðarmót er ég hætt að syrkja WorldClass og mæti núna á hverjum degi !  Betra að nota þennan pening sjálf ...... já og kannski tapa einhverjum kílóum þarna inni.  Ekki væri það nú verra .......
Ég fer nánast alltaf í WorldClass í Spönginni en þar er lokað á sunnudögum í sumar þannig að ég hef farið báða sunnudagana í langan göngutúr í staðinn   Nema í gær þá lá eitthvað illa á miðjumanninum mínum honum Sigtryggi þannig að ég bara dreif hann út með mér í göngutúr.  Fannst það alveg prýðileg hugmynd alveg þangað til að við vorum aðeins komin af stað og ég var fari að kalla til hans alveg lafmóð: "Sigtryggur minn ekki hlaupa á undan mömmu !"  Hann staldraði augnablik við og svaraði: "Ég er ekki að hlaupa, ég labba hratt"   Svei mér þá ég held að ég verði að komast í aðeins betra form til að halda í við drenginn

Nýjar myndir á nýjum stað ......... SMELLIÐ HÉRNA og kíkið á

Allt of þreytt til að blogga ....

...... en ég ætla nú samt að hamra smávegis inn ......

Undanfarna daga hefur svo sem ekki mikið á daga mína drifið.  Lífið er kominn í sinn vanagang eftir vel heppnað og skemmtilegt sumarfrí   Ég byrjaði að vinna á þriðjudagskvöld (er s.s. á vakt nr. 3 núna ...... GEYSP), Óli byrjaði í sinni vinnu á þriðjudaginn, strákarnir fóru í frístund og Halla Katrín á leikskólann á þriðjudaginn einnig   Mikið svakalega er nú gott að lífið færist aftur í fastar skorður eftir sumarfrí.  Ekki það að ég sé að vanþakka sumarfríið eða að það hafi verið leiðinlegt, það er alls ekki svo.  Heldur er þetta bara orðið svolítið langt frí fyrir einhverfu gaurana mína sem þrífast á því að hafa allt í föstum skorðum.  Það var eiginlega alveg óborganleg sjón að fylgjast með honum Sigtryggi mínum á mánudagskvöldið.  Hann ljómaði eins og sól í heiði yfir því að vera að fara í frístundina daginn eftir   Greinilega mjög sáttur við að allt væri að færast í sínar föstu skorður.

Hjá mörgum telst það kannski ekki til frétta að fara í bíó en hjá mér telst það sko til frétta !  En á mánudagskvöldið fór ég í bíó með henni Kiddý   Við fórum að sjá Mamma Mía í Smárabíó og men hvað ég skemmti mér konunglega !  Þessi mynd er alveg frábær   Mest langaði mér til að syngja með en ég held að þeir sem sátu í kringum mig hefur kannski ekki höndlað það þannig að ég raulaði bara með í hljóði ........

Læt þetta duga í þetta sinn .....

 

Þetta hlítur að hafa verið grín !

Boðorðin 10 úr heimilisfræðum frá 1954

1 )  Hafðu kvöldmatinn tilbúinn á réttum tíma.  Það veitir honum þá tilfinningu að þú hafir verið að hugsa um hann og að þér sé annt um þarfir hans.   Flestir karlmenn eru svangir þegar þeir koma heim og tilbúinn matur er hluti af því að láta hann finna hversu velkominn hann er heim, en það er karlmönnum nauðsynlegt.

2)  Notaðu 15 mín til að snyrta þig og skipta um föt áður en hann kemur.  Hann er að koma heim úr leiðinlegri og erfiðri vinnu og er þreyttur.  Vertu svolítið hress og skemmtileg til að hressa hann við.

3)  Taktu upp allt rusl og dót.  Farðu eina umferð um húsið og safnaðu saman skólabókum, leikföngum, pappírsrusli og blöðum.  Renndu svo tusku yfir borðin til að þurrka af og þrífa svolítið.  Eiginmanni þínum mun finnast hann kominn í friðarparadís og það hefur mikið að segja fyrir hann. 

4)  Snyrtu börnin til.  Það tekur aðeins nokkrar mínútur að þrífa hendur og andlit og greiða þeim.  Ef þarf, skaltu láta þau skipta um föt.  Þau eru hans fjársjóður og hann vill sjá þau þannig.

5)  Sjáðu til þess að húsið sé hljóðlátt.  Slökktu á öllum vélum, s.s. þvottavél, þurrkara og ryksugu.  Reyndu að sjá til þess að börnin hafi hljótt.  Taktu á móti honum með glöðu brosi.

6)  Gættu þess að hella ekki yfir hann kvörtunum þegar hann kemur.  Ekki heldur kvarta þó hann komi of seint í mat.  Þú getur verið viss um að þínar kvartanir eru minniháttar í samanburði við það sem hann hefur þurft að þola yfir daginn.

7)  Sjáðu til þess að hann hafi það þægilegt.  Láttu hann halla sér aftur á bak í hægindastólnum eða stingdu upp á því að hann halli sér smá stund í rúmið.  Vertu tilbúin með kaldan eða heitan drykk handa honum.  Bjóddu honum að klæða hann úr skónum og hagræddu púðunum undir honum.  Ræddu við hann með rólegri, mjúkri röddu.  Leyfðu honum að slaka á.

8)  Láttu hann ráða kvöldinu.  Ekki kvarta þó hann fari ekki með þig út að borða eða á aðrar skemmtanir, reyndu í stað þess að skilja að hann hefur fengið sinn skerf af streitu og látum yfir daginn og þarfnast hvíldar heima.

10)  Markmiðið er að gera heimilið að stað þar sem eiginmaður þinn getur fundið frið og reglu og getur slakað á eftir erfiðan dag.

Einhverra hluta vegna hefur 9. boðorðið fallið út .......... 

Þetta hlítur bara að hafa verið grín, það getur bara ekki annað verið ! 

Kominn tími á smá blogg

Í síðustu færslu var "alveg að bresta á með sumarfríi" en núna er staðan þannig að sumarfríið er að verða búið.  Bara 4 dagar eftir þangað til að ég fer að vinna á ný

Þessi tími er búinn að vera alveg frábær.  Danmerkurferðin gekk alveg ljómandi vel.  Þar fórum við í heimsóknir til frændfólks og vina nú og svo voru þræddir dýragarðar og LEGO land heimsótt tvisvar sinnum   Síðast en ekki síst fórum við Óli í brúðkaup þeirra Olgu systir hans Óla og Gísla mannsins hennar   Myndavélin var auðvitað með í för í Danaveldi og þegar heim kom var ég búin að taka ca 1.400 myndir   Ég er ennþá að vinna úr þessum myndum og læt vita hérna um leið og þær eru komnar í albúm.  En eitt það besta við vel heppnaðar ferðir er að koma heim aftur og við komum heim þann 19. júlí.  Reyndar tæknilega séð var kominn 20. júlí þegar við komum heim því að við lentum í Keflavík rétt fyrir miðnætti og vorum ekki komin heim fyrr en um klukkan 2 um nóttina !
Við stoppuðum nokkra daga heima hjá okku, bara svona passlega til að þvo ca 8 þvottavélar ! og drifum okkur svo norður í útilegu með pabba og mömmu.  Við áttum alveg yndislega daga í sól og sælu í túninu við æskuheimili mömmu minnar, Núp  

Framundan um verslunarmannahelgina er svo Grís 2008   En það er einkaútihátíð með einkar heimilislegu ívafi haldin austur í Grímsnesi   

Alveg að bresta á með sumarfríi !

Í þessum skrifuðu orðum eru bara 5 1/2 tími eftir af síðustu vaktinni minni fyrir sumarfrí   Nú og svo eru bara 2 sólarhringar þangað til að við leggjum í'ann til Danmerkur   Tóm gleði og engin vinna fyrr en eftir verslunarmannahelgi   Spennan fyrir Danmerkurferðinni stigmagnast og meira segja er Halla litla farin að segja: "Gammökku" (ísl. þýð. = Danmörku) þegar hún er spurð að því hvert hún sé að fara með stóru flugvélinni á föstudaginn

Síðustu dagar hafa verið frekar rólegir og afslappaðir hjá mér.  Sigtryggur er ennþá í sumarbúðunum í Reykjadal og Kristján og Sigurjón báðir hjá pabba þeirra. 
Um síðustu helgi fórum við Óli ásamt stelpukrílinu henni Höllu Kötu austur í Ormsstaði.  Þar bauðst okkur "sumarbústaður" yfir helgina.   Við höfðum það svaka fínt þar og Óli notaði laugardaginn í að skreppa í smá hjólaferð með Nonna. 

Á mánudaginn var svo tvöfalt afmæli heima hjá mér, Óli minn varð 37 ára og við áttum eins árs brúðkaupsafmæli   Við héldum upp á daginn með því að fara saman út að borða í hádeginu á TGI Friays og grilla svo nautalund í kvöldmatinn   Það var auðvitað rauðvín með nautinu en samt mjöööööög lítið handa mér því að eftir matinn lagði ég mig og fór svo í vinnuna um nóttina ........ Svolítið fúlt en við bætum það bara upp á miðvikudagskvöldið   Og þá er ég vitanlega að tala um að klára rauðvínsflöskuna  

Orðaforðinn hjá stelpukrílinu mínu er sífellt að aukast og getur það verið mjög fyndið að heyra það sem hún hefur að segja.  Eitt af því nýjasta hjá henni er að hneykslast og segja "ó mæ dod !"    Svo þegar við erum að hvetja hana til að t.d. klára matinn sinn lítur hún á mann og segir ákveðin: "Nei mamma, tetta alveg nó"

Að lokum er svo myndbandstubbur sem að ég tók af henni í dag við að telja peninga sem hún var að fara að setja í baukinn sinn.  Þess má geta að það er hann Sigurjón Stefán, stóri bróðir með meiru, sem á heiðurinn af því að kenna systur sinni að telja

Smá viðbót ...... Það eru nýjar myndir í albúminu hérna á bloggsíðunni ......

Ég á svo yndislegan mann !

Ég bara verð að segja ykkur hvað ég á frábæran mann   Ég hef stundum verið að stríða honum á því að það vanti svolítið meiri rómantík í hann og sagt honum að ég fari  að skrá hann í skóla, rómantík 103  

En hann kann samt að koma mér yndislega á óvart   Akkúrat núna er ég í vinnunni, á aukavakt sem að ég tók fyrir vinkonu mína svo að hún geti haldið upp á afmæli mannsins síns.    Vaktin er búin að vera frekar róleg og ég setið á vaktinni, kíkt á bloggið, mbl.is og fleira.  Rétt áðan fannst mér ég heyra eitthvert skrítið hljóð og þegar að var gáð var þetta reminderinn á símanum mínum sem var að pípa.  Þegar ég tók símann upp blikkaði á skjáunum "Ég elska þig"  

Hann Óli er alveg yndislegur og ég elska hann alveg heilan helling !

Útilega og ýmislegt fleira

S.l. föstudag keyrðum við miðjumanninn okkar hann Sigtrygg Einar í langþráða dvöl í sumarbúðum SLF í Reykjadal.  Hann er búinn að vita af þessu í nokkrar vikur og hefur biðin verið frekar löng að hans mati.  Hann fór í fyrsta skipti þangað í fyrrasumar og það gekk svo ljómandi vel að þegar var farið að minnast á Reykjadal aftur varð hann mjög spenntur og vildi ólmur fara þangað aftur   Í dag fékk ég svo fréttir af drengnum, allt í góðu gengi og hann sæll og glaður með lífið   Hvernig er hægt annað eftir að hafa fengið að fara að veiða, í sund, fjallgöngu og vaða, allt sama daginn

S.l. helgi fór unglingurinn okkar hann Kristján Atli til pabba síns og Sigurjón Stefán kom til okkar.  Kristján fékk reyndar að velja hvort hann færi til pabba eða kæmi með okkur í útilegu.  Hann valdi rólegheitin hjá pabba   En spurði samt hvort við færum ekki í aðra útilegu í sumar.  Við sögðum honum að það væri alveg öruggt að við færum í nokkrar útilegur í sumar þannig að hann væri sko ekki búinn að missa af því þó hann færi ekki með í þetta sinn. 
Seinnipartinn á föstudag var svo öllum gírnum ruslað út í bíl og við héldum af stað í útilegu.  Eftir að við höfðum hitt ferðafélagana, familíuna á Ormsstöðum,  á Selfossi héldum við áfram í samfloti við þau að Hellishólum í Fljótshlíð þar sem að við "tjölduðum" og höfðum það fínt um helgina.  Þarna á Hellishólum er alveg frábær aðstaða og stórskemmtilegt að vera.  Myndavélin var auðvitað með í ferðinni  Smellið á myndina hérna fyrir neðan til að sjá fleiri

Heima hjá mér er talið niður í brottför til Danmerkur og í gær sagði Kristján minn að það væru bara 11 dagar þangað til að við færum  

Þangað til næst hafið það eins gott og þið getið

Í vinnu á ný eftir ágætt frí

Nú er sælan á enda í bili og ég komin í vinnuna aftur   Æi það er alveg ágætt að koma í vinnuna, hitta allt fólkið "mitt" og fara að hlakka til að fá næsta frí sem er einmitt þegar við förum til Danmerkur  

Það sem að ég sagði í gríni í síðustu færslu, að ég ætti bara að senda fyrrverandi og núverandi saman með krakkahópinn, nefndi ég við manninn minn á fimmtudagskvöldið í gríni líka og honum fannst þetta fín hugmynd og í gærmorgunn fóru þeir saman með hópinn og sóttu um vegabréf fyrir þau öll.  Þannig að nú er von á 4 vegabréfum inn um lúguna í næstu viku  
Sigtryggur minn var til að byrja með ekki alveg á því að fara í þetta.  "Ekki taka mynd" sagði hann og var svolítið órólegur yfir þessu.  Ég náði í passann hans Óla og sýndi honum og sagði honum jafnframt að hann yrði að eignast "svona bók" með mynd af sér ef hann ætlaði til útlanda í sumar.  Það fengi enginn að fara til útlanda sem ætti ekki svona bók.  Þetta virkaði og hann fór sáttur í  vegabréfaumsókn og stóð sig auðvitað mjög vel

Nú er allt að verða klappað og klárt fyrir Danmerkurferðina.  Búið að sækja um vegabréf fyrir krílin og í dag gengum við frá pöntun á gistingu fyrstu nóttina í Danmörku.  Við fáum nefnilega ekki húsið fyrr en daginn eftir að við komum út.  Við pöntuðum okkur bændagistingu hér:

Lille Grynborg